20130111

Tribuna liura

La F.E.L.C.O. reagís al "Manifeste occitaniste" en fasent un "Manifeste franciste":

FELCO
"Manifèst occitanista – comunicat FELCO en seguida de son AG del 15 de decembre 2012

La FELCO a recebut lo Manifeste occitaniste, signat de David Grosclaude e Guilhem Latrubesse.
Naturalament, cadun es liure de se li associar o non.
Coma tala la FELCO, associacion professionala, a pas a préner partit, e d'impausar que que sia als ensenhaires del public que racampa. Nos contentarem doncas de quauques remarcas generalas.
- Dins lo manifèst caupon de causas que naturalament, pòdon pas èstre negadas per los que son engatjats dins un combat per la reconoissença de l'occitan. Qual poiria èstre contra lo refus de l'uniformizacion culturala ?
Mas partejar aquela posicion umanista implica pas que tot lo mond pòsca aderir a las preposions concretas del manifèst. Una presa de posicion de natura politica implica per necessitat l'adesion a un projecte de societat, que totes los que son estacats a la lenga son pas cogits de partejar. Es pas possible de far coma se l'engatjament al servici de la lenga significava l'adesion a una vision comuna de çò que deu estre l'accion politica e sociala. En se, la revendicacion per la lenga es pas, e pòt pas èstre, un projècte de societat dins totas sas implicacions. Vòl dire que coma tal, « l'occitanisme » existís pas. I a d'occitanismes, çò es de sectors de l'accion per la lenga occitana que menan lor accion dins de sectors particulars, que se trache de sectors d'activitat (cultura, creacion, edicion, medias, animacion culturala, ensenhament public, ensenhament associatiu, accion politica...) o de sectors geografics. La varietat dels engatjaments e de lors implicacions en societat fa que degun es pas abilitat a parlar al nom de totes, sens aver premier de tot consultat las diversas compausantas del païsatge occitan, sens presumar a priori de çò que deu èstre lor opinion. Es malastrosament çò que s'es tròp sovent produch.
- La particularitat de l'espaci occitan, sa benediccion e sa malediccion a l'encòp, es sas dimensions. Lo manifèst parla del « territòri ont a viscut e viu la lenga d'òc » de las Alpas als Pireneus -la trentena de despartiments que se ne parla totjorn. Mas designa coma actors privilegiats de tota accion per la cultura d'òc las institucions regionalas ara existentas, e que correspondon a de territòris particulars que pas cap de ligason institucionala los religa als autres que partejan la meteissa lenga. En l'abséncia d'una vertadiera coordinacion institucionala entre las regions d'òc, es clar que caduna risca d'aver (a dejà) sa politica pròpria, que dins l'ipotèsi, pas brica assegurada, qu'implicarà un engatjament per la cultura del luòc, pas res garantís que serà coordonada e coherenta amb la politica de sas vesinas. Foguèsse lo cas, se sabria.
- Daissam naturalament de caire la question dels mejans que las regions ne poiran dispausar. La politica dels ans passats es estada de limitar al maximum las dotacions de l'Estat cap a las collectivitats localas, après de lor aver levat una part de las ressorças proprias que podian aver, avans ; e aquesta politica sembla pas remesa en causa. Cal veire de pròchi dins lo projecte Lebranchu çò que la reforma anonciada per las collectivitats localas cambiarà, o pas, a l'estat actual. Mas es delicat d'anticipar tre ara, sul mòdi de l'acte de fe decentralizatritz. Per çò que tòca l'ensenhament public, sabèm tròp las diferéncias entre las diversas regions, e, de còps que i a lo refús de tala o tala de far que que sia, o la tendéncia de tala o tala de considerar que sa lenga de referéncia es pas la de las autras, per pas nos pausar de questions sus las consequéncias que podria aver una devolucion sens precaucions de la politica linguistica per l'òc a de regions que tròp sovent an pas de vision de la lenga en defòra dels confins de lor territòri.
Brèu, entre las distorsions entre regions e lo gròs ponch d'interrogacion suls mejans, aquesta devolucion nos pareis potencialament mai dangeirosa que non pas profechabla per l'ensenhament public, es a dire per lo que, tot comptat rebatut, racampa lo mai grand nombre d'escolans concernats per l'occitan. Es una divergéncia màger amb lo manifeste.
- Sus la question dels departaments, lo manifèst afortís : « Nous sommes favorables à la suppression des départements. » Sus aquela question tanpauc, avèm pas d’opinion coma FELCO. Nos demandam pasmens cossí pòt èsser conciliabla amb una opinion publica en general estacada a son departament… Risca tanben de metre l’occitanisme cultural en dificultat pertot ont los departaments son sollicitats e son actius dins son sosten a nòstra cultura. Rampelam que la tendéncia es a completar las convencions Rectorats / Regions, per de convencions amb los departaments. Enfin, una tala presa de posicion risca de copar l’occitanisme de sas relacions amb mantun elegit.
- Aquò vòl pas dire que cap d'accion comuna es pas possibla entre las diversas compausantas de la movéncia "occitanista". Mas significa que cal saber a quente nivèl la convergéncia es possibla. Lo manifesta prepausa una via, e doncas la construccion d'una instància collectiva al servici d'aquesta accion. Lo problèma es qu'una instància aital existis jà, potencialament, pro qu'un decide de la far foncionar : es la coordinacion Anem Oc.
- Es la coordinacion que sus una basi clarament limitada al camp cultural a sabut dins los darrièrs ans organizar las manifestacions de Besiers, Carcassona, e Tolosa. S'i retrobavan las associacions pan-occitanas las mai representativas. La FELCO avèm sempre pensat, e dich, que Anem òc podia pas èstre soncament una estructura organizatritz de manifestacions bi-annualas.
Devia tanben èstre lo luòc de debat e de projeccion vers l'avenir racampant las diversas compausantas del moviment cultural, per tal de definir d'objectius comuns, de revendicacions partejadas, e las accions collectivas que se podian menar sus la basi d'aqueles objectius comuns. La FELCO, coma tala, es lesta a participar a la reflexion que se podrà menar dins aquel encastre.
Un messatge recent d'Ana-Maria Poggio sus una relança d'Anem òc mòstra qu'aquel pensament es tanben lo de l'IEO. Mas, o repetam, nos es estatutàriament impossible de participar a una entrepresa que sos apeons serian de natura directament politica."